مرحبا بكِ في منتديات ينبوع المحبة ! هل هذه هي زيارتك الأولى للمنتديات ؟

سجلي معنا

انت الآن تتصفحين منتديات ينبوع المحبة | منتديات مغربية | LoveFount

الملاحظات


تجميع تصاميم البيجامة مع zahrat albarari

بسم الله وعلى بركة الله نبتدا ورشة البيجامة كيف وعدناكم عزيزاتي هاد الورشة راها جد سهلة وحاولت نسهل اكثر ما يمكن وراني عملت بترون جد جد مبسط كدلك اللي

8 معجبون
إضافة رد
 
أدوات الموضوع انواع عرض الموضوع

  #1  
قديم 2012-06-15, 04:35 PM
الصورة الرمزية safae
safae safae غير متواجد حالياً
مشرفة حواء المدبرة
 






التفاعل 16%:
النشاط: 16% النشاط: 16% النشاط: 16%
افتراضي تجميع تصاميم البيجامة مع zahrat albarari









بسم الله وعلى بركة الله نبتدا ورشة البيجامة كيف وعدناكم عزيزاتي
هاد الورشة راها جد سهلة وحاولت نسهل اكثر ما يمكن
وراني عملت بترون جد جد مبسط كدلك اللي كيخاف من البترون حطيت ليه طريقة اللي كنعتمد في خياطة البيجامة بحكم المقاييس ديالها غير محدودة
وهي تفصلي الثوب على بيجامة ديجا مخيطة عندك هدا كله باش تزعمو على خياطة ملابسكم
يا الله يا الحادكات اللي تبع معايا اكيد غادي يوصل لنتيجة رائعة وما تخافوش من الاخطاء لان بها كيتعلم الانسان
وراه.............اللي ما خيط كساته موته احسن من حياته ههه

بلا ما نطول عليكم
تبعو المراحل وان شاء الله كلشي يجيكم ساهل



بيجامة طويلة بكمام تروى كار

1
تفصيل البيجامة


الثوب قطن ليكرا لون واحد ومزوق



وهدا بترون اللي عملت جد بسيط ونتمنى يكون مفهوم



وهده طريقتي اللي كنستعمل باش نفصل البيجامة هي طريقة جد سهلة
تنيت الثوب على اربعة مطوي مزيان يمكن ليك تعمليه على 2وتفصلي الامام بوحدو والوراء بوحدو
خديت بيجامة عندي ومناسبة للمقاس اللي بغيت وتنيتها بحال في الصورة وحطيتها على الثوب وبديت نتراسي بطباشير او لو كخي الخاص ايلا عندنا
تراسيت العنق ونزلت بالكتف مع مراعاة سنتيم الخياطة



هزيت الكم وبديت نتراسي الدورة تالكتف يمكن تعمليها ب لاكوغب ايلا عندك
وتزيدي بسنتيم او 2 تحت الابط باش ما يجيكش مكروف
وتنزلي بالطول اللي بغيتي مع مراعاة التكفاف او لوغلي


وعملت بحساب الفتحة التحت لاني ما درتش الافازي بزاف


ملي كملت الترساج قصيت الثوب



هاد الطريقة اللي عملت كيكون بحال اللور بحال القدام
كناخد النصف اللي بغيتو القدام ونقور فتحة العنق من حرف فتحة العنق ونزل بحساب الفتحة العنق اللي تناسبني
وما نساش بان في هاد البيجامة ما غاديش يكون الصدف يعني نعمل بحساب يدخل الراس



دابا كملت اللور والقدام


ناخد الثوب المزوق اللي بغيت نعملو في الكمام ونتنيه مزيان على 4 ونوضعو بحال في الصورة تحت الدورة ديال الكتف باش نفصل عليه


وهنا فصلت الكم


ندوزو دابا للجيب يمكن تستغني عليهم انت والموديل اللي حبيتي المهم هنا باش تشوفي الطريقة
نتني طريف الثوب 2قياس الجيب اللي بغينا وندير بحساب انه غادي يجي مجموع من الفوق وندور الحواشي


صافي وقصيت الثوب
سمحو ليا ما صلحتوش انتم لازم تصلحو الثوب ايلا كان مكرش باش ما يعدبكم في الفصالة ويخسر ليكم المقاسات


هنا ملي سرحتو هكدا خاصو يكون


ثم فصلت له بانضة من الثوب من الفوق


هنا كملت تفصيل جميع القطع
كيف كتشوفو فصلت حتى البانضة اللي غادي تدور على الكول
وفصلت كدلك بانضة عريضة غادي تكون الوسط غير للتزيين





2
خياطة البيجامة


خيطت الفوق بالمكينة كيفما يمكن تعملي غرزة الباتي او السراجة بايديك كيف شفتوها في درس الغرز مع جنات
وجريت الخيط باش يعطيني لي فخونص كنجر حتى نشوف القياس اللي بغيت


وخيطت البانضة على الحاشية الجيب


ودخلتها الداخل يمكن تعملي اوغلي من الداخل بيديك كيفما يمكن تخيطيها بالمكينة من الفوق


هاهو الجيب كمل وخيطت الجناب باش يجيتي ساهل فوق البيجامة


كنتبثو بالفناتي فوق البيجامة باش ما يزلق ويجي متوازن في العلو اللي بغيت عاد ندور عليه بالخياطة


هنا خيطت الجياب بجوج خاص يجيو متوازين
وخيطت كدلك البانضة في الوسط هكدا كيجي اسهل


تم تجمعي الكتاف بالخياطة كيف الصورة


انا كنعاود الخياطة 0.5 من الفوق خصوصا ايلا كنت نخيط الثواب الرطيطبة بحال القطن باش ما تمازى لانها كتتيرا


ملي كنخيط الكتاف كندور البانضة على الكول بهاد الطريقة


تم ندخل الطرف للداخل ونخيط يا ايما بايدي او بالمكينة بحال كيف سبق في الجيب


هدا شكله


وندوزو للكمام نخيطوهم كما في الصورة


هنا كنركب لاستيك للاكمام كنشد طرف لاستيك في الاول ونبدا نجر وانا كنخيط والثوب كيتجمع لراسو
تم نتني ونجع الكم بالخياطة
كيف يمكن نخيط تنية وندخل فيها من بعد لاستيك بشي فيلول انت واختيارك






بالنسبة للوريدةفكنتني بانضة ديال الثوب على 2 ونشدها بغرزة بيدي كيف الصورة ومن بعد نجر الخيط كيف كتشوفو


ونجمع الجانبين بيدي من الوراء بحال في الصورة


ناخد صدفة كيفما كانت ونغلفها بالثوب بحال هكدا ونقص الزائد ونتبثها في الوسط

هدا الشكل النهائي كيبقى نخيطها فينما بغيت


عملت منها زوج وتبتهم في الوسط





اما الوراء فخيطت لاستيك بهاد الطريقة هدا اختياري
انا غير بغيت يكون عندها منظر حتى في اللور وتبان فيها الفصالة






هدا لاستيك اللي خيطت اللور من برا ومن الداخل



هدا الشكل النهائي للبيجامة





هدا موديل اخر ضفتو فقط باش تعرفو وخا مختلف على الاول راهو ساهل وكنطلقو من الموديل الاول


الاختلاف في الكمام كيف كتلاحضو في الصورة الدورة ديال الكم كبرتها على الكسوة لانها غادي نجمعها بليفخونص من فوق الكم ولاستيك من تحت الكم في الصورة الثانية لاني بغيت نص كم يجي منفوخ

ومن بعد نخيط الكم


كدلك كنزيد الافازي مزيان
بديتو من تحت الكم وانا غادية بحساب العرض اللي بغيت
هنا راها قريبة تولي كلوش


وهنا التعديل في البترون السابق بالخط الاحمر المتقطع
والكم كيف قلت سابقا كتزيدي في الدورة ديال الكتف على حسب الفخونص اللي حبيتي

زينتها بشريطين ستان وسطهم حزام مخيط في الوسط فقط وغادي يتعقد في الوراء
هاد الكسوة تلبس هكدا كيف ممكن ايلا دعات الضرورة و بغيتي تستري يديك تلبسي دوك الكمام منفردين بزربة اللي كيتباعو او تخيطيهوم لراسك


زدت هاد البيجامة او الكسوة ديال الدار فقط باش تشوفو بانه دغيا تبدلي في الموديل انطلاقا من البترون الاساس
باش تبقاي دائما ينبوعتي العزيزة انيقة واميرة في مملكتك بيتك



نتمنى من الله يكون شرحي موضح وتجيكم البيجامة ساهلة وفعلا راها ساهلة خاصكم غير تزعمو يا البنات

نلتقي ان شاء الله في درس سورفيت الدار في القريب ودائما مع الساهل الماهل
باش تزعمو على الخياطة وطهلاو في روسكم

وان شاء الله نشوف تطبيقاتكم

j[ldu jwhldl hgfd[hlm lu zahrat albarari

رد مع اقتباس

قديم 2012-06-15, 04:37 PM   رقم المشاركة : [2]
safae
مشرفة حواء المدبرة
الصورة الرمزية safae
 
التفاعل 16%:
النشاط: 16% النشاط: 16% النشاط: 16%

safae ينبوعة محترفة
افتراضي رد: تجميع تصاميم zahrat albara البيجامة مع زهرة البراري





البينوار


بالنسبة للبنوار فهناك انواع وكننطلقو من الباترون الاساس ديال البيجامة وحنا كنعدلو فيه على حسب اللي بغينا

بنوار كروازي

بنوار الدار وكدلك لبنوار الحمام




كنتراسيو البترون الاساس ديال البيجامة ونعملو الافازي يبدا من تحت الكتاف لانه هاد الشكل البينوار تيكون شوية واسع وممكن تسانتريه ايلا بغيتي
والحهة الخلفية كتفصل عادية
اما الجهة الامامية فكنزيدو على القياس اللي عندنا من 7 حتى 10 سنتمترات حتى التحت كما هو موضح في البترون
نقدرو فتحة العنق ونتراسيو الكول ابتداءا من حافة العنق
الخط المتقطع المبين في البترون غادي نزلوه
نتمنى نكون شرحت مزيان
تم تفصلي الكم على دورة الكتف وتعملي الطول والعرض المناسبين



وهده طريقة وبترون الكول
نقابل الجزء الامامي والجزء الخلفي ونقدر عرض الكول اللي بغيتومن بعد نتراسيه كيف الصورة بالاحمر




وهكدا غادي يكون بعد الخياطة



وكيف سبق قلت هناك موديلات عديدة في البينوار المهم ننطلق من بترون الاساس ونعدلو فيه كيف بغينا
هادو بعض الموديلات البسيطة
هدا كنفصلوه فحال البيجامة ونعملو بحال الكول شوميزي مع العرض اللي بغينا
والصداف حتى التحت ونعملو بحساب الحاشية الصداف عند الفصالة
او نلصقو على طول حاشيات فتحات الامام باندا او كارنيتير للصداف وطبعا نسانتريوه ايلا بغينا اونعملو له بانسات



هدا راه بحال اللي سبقو الاختلاف في الكول هنا كول اوفيسيي





نطولوه ولا نقصروه ونعملو معاه سروال
كدلك يمكن ناخدو ستان او لاسوا ونعملو معاه شوميز دو نوي كيف حبينا وندخلو لي دونتيل الشبيكة وغيرو.....
انت واجتهادك ودوقك





safae غير متواجد حالياً   رد مع اقتباس

قديم 2012-06-15, 04:38 PM   رقم المشاركة : [3]
safae
مشرفة حواء المدبرة
الصورة الرمزية safae
 
التفاعل 16%:
النشاط: 16% النشاط: 16% النشاط: 16%

safae ينبوعة محترفة
افتراضي رد: تجميع تصاميم zahrat albara البيجامة مع زهرة البراري





البيجامة بالقطعة ولي فخونص في الوسط


اختاريت هاد الموديل لانه كدلك معظم البيجمات سواء القصيرة او الطويلة كتكون على هداك الشكل






والطريقة ساهلة وكيف غادي يوضح ليكم البترون


غادي تفصلي الجهة العليا للبيجامة الى ما تحت دورة الصدر
اما الجهة السفلى فكتزيدي في العرض على حسب شحال ديال لي فخونص لي حبيتي تعملي
من بعد تدوزي بغرزة الباتي او بالمكينة مرخية وتبداي تجري الخيط ولي فخونص او التنيات كيتكونو حتى يبقى ليك نفس عرض دورةالصدر


صافي وتجمعي الجهتين بالخياطة
نتمنى يكون الشرح مفهوم

تعمليها بيجامة طويلة او قصيرة
او مع السروال اللي كيبقى نفس الباترون السابق ديال السروال غير انت كتقصريه ايلا بغيتيه بونتاكوغ او تسانتريه
او تقصريه وتعملي له باندا من التحت او زيد او زيد....






بيجامة ب plis creux




الطريقة موضحة بالصور



بعدما عبرنا منتصف الجزء السفلي اللي بطبيعة الحال غادي يكون اعرض من الجزء العلوي للبيجامة نرسمو ثلاث خطوط متوازية بين كل خطين 2 سنتيم ويمكن تكبري ايلا بغيتي البلي تجي كبيرة على النصفين الامامين للبيجامة
الخطوط المتقطعة في الصورة هما فين غادي نتني



نتني على الخط المتقطع وراس التنية على الخط الاسود
ونجيب خطين الجنب بتنية معاكسة ونتبتهم في خط الوسط
ونخيط والخياطة بطبيعة الحال كتكون في قفى الثوب اي الجهة الورانية
ومن بعدما نصلحها او نحددها بالمصلوح عاد كتبان مزيان البلي




نتمنى يكون شرحي واضح



من بعد ما نخيطو الجزء العلوي والسفلي
هكا غيكون الشكل النهائي




ممكن تعملي البلي من عند الكتاف وفي هاد الحالة ما تكونش القطعة في الوسط غادي تجي البلي من وسط الكتف الى تحت الصدر او كيف حبيتي
مع مراعاة تفصلي الكتاف عراض باش تعملي البلي


يارب يجيكم الدرس ساهل ونشوف عن قريب التطبيقات




safae غير متواجد حالياً   رد مع اقتباس

قديم 2012-06-15, 04:40 PM   رقم المشاركة : [4]
safae
مشرفة حواء المدبرة
الصورة الرمزية safae
 
التفاعل 16%:
النشاط: 16% النشاط: 16% النشاط: 16%

safae ينبوعة محترفة
افتراضي رد: تجميع تصاميم zahrat albara البيجامة مع زهرة البراري






سورفيت الدار




نعمل نفس البترون السابق اللي سبق لينا شفناه في البيجامة
هنا فقط كنزيد 2 سنتيم عند الفتحة في الوسط لتركاب السلسلة
و الطول حسب الرغبة طويلة او قصيرة






كنزيد غير الكول
وهده طريقة فصالته نتمنى تكون واضحة


ويمكن لي نعمل له سير داير بيه نخيط فوق الكول حاشية باش ندخلو فيها وما نشدش معاه السلسلة


وهادو الجياب





اما السروال فهدا البترون لي صاوبت للسروال جد مبسط وانت كتلعبي بيه تعمليه كيف بغيتي مجموع من الرجلين. ايفازي .با ديليفون....






اما طول البيجامة فانت ودوقك تعمليها قصيرة او طويلة او متوسطة



وهادي طريقتي اللي كنستعمل عادة= الفصالة على لبسة طالعة
نبدا بالجزء العلوي
تحطي الثوب وتبداي تراسي الثوب تيكون على 2
وملي تبغي تفصلي الامام وتبغي تعملي فيه السلسلة او الصداف تديري بحساب دالك وتخلي 2 حتى 3 سنتيم من كل نصف امام

ملي توصلي الدورة ديال الكتف يا ايما كتراسيها بلاكوغب ايلا عندك ولا كتزيد واحد2 سنتيم او1 على حسب العرض لي بغيتي وتقوري بالتراساج كيف الصورة


صافي وتكملي الترساج


وملي تكملي كتاخدي النصف الثوب لي فصلتي وعلى الدورة تالكتف كتفصلي الكم بعدما خديتي الطول ديالو






السروال

نحط السروال على الثوب ونتراسي




والصور باينة


ويمكن لي ننقص العرض ايلا بغيت او الطول كدلك على حسب اشنو بغيت




انا هادي كنت خيطتها على شكل جبدور للدار والثوب الاسود استعملتو فقط للشرح
اللي كنتمنى نكون توفقت فيه




سورفيت الدار بالكابشون او القب





دائما نفس البترون


اللي غادي نزيدو عليه هو القب
وهاهو دا البترون ديالو اللي عملت نتمنى تكون طريقة الشرح مفهومة





ويمكن تعمليه بوانتي بحال ديال الجلابة
كيف هدا راه بحال الشكل الاول في الفصالة غير ما كتقوسش الراس



اما السروال فراه ديما نفس البترون








نتمنى كلشي يكون واضح
ونكون توفقت ان شاء الله باش نسهل عليكم الفصالة ونزعمكم عليها




التعديل الأخير تم بواسطة zahrat albarari ; 2012-06-15 الساعة 06:53 PM.
safae غير متواجد حالياً   رد مع اقتباس

قديم 2012-06-15, 04:51 PM   رقم المشاركة : [5]
safae
مشرفة حواء المدبرة
الصورة الرمزية safae
 
التفاعل 16%:
النشاط: 16% النشاط: 16% النشاط: 16%

safae ينبوعة محترفة
افتراضي رد: تجميع تصاميم البيجامة مع zahrat albara






عزيزاتي الينبوعات نتمنى تكونو قضيتو معايا عبر ورشة البيجامة اوقات ممتعة ومفيدة
ونتمنى كدلك نكون شجعتكم باش تصاوبو حويجاتكم بنفسكم
هدا كله لانكم يا الينبوعات عزاز وبزاف
والله يتقبل منا خالص الاعمال يا رب
وباش نزيد نزعمكم اختاريت نختم هده الورشة بصور بعض بيجاماتي من خياطتي ان شاء الله تعجبكم

نبدا على بركة الله

هادو بيجامات قصيرة قليل فاش كنخيطها لانها موجودة في السوق لكن ملي كنلقى قطن او ايكرا زوينة ما كنترددش نفصلهم واكييد كتطلع احسن وارخص من ديال السوق







هادو بيجمات وكسوات دار طوال
كنفضلهم على دوقي لهدا كنبغي نفصلهم لراسي
واللي اكييييد هوكيطلعو ارخص وافضل من ديال السوق









هادو دخلت فيهم السفيفة والقيطان وجاو على شكل قفيطنات جبادور خفاف ومريحين وديما احسن والاهم ارخص ملي في السوق


فراشة بالسروال








ان شاء الله يعجبكم هادشي ويشجعكم
ونشوف عن قريب تطبيقاتكم


الى اللقاء في نشاط اخر بحول الله
استودعكم الله الدي لاتضيع ودائعه








التعديل الأخير تم بواسطة zahrat albarari ; 2012-06-15 الساعة 06:51 PM.
safae غير متواجد حالياً   رد مع اقتباس

قديم 2012-06-19, 08:39 PM   رقم المشاركة : [6]
مدام التازي
ينبوعة ماسية
الصورة الرمزية مدام التازي
 
التفاعل 0%:
النشاط: 0% النشاط: 0% النشاط: 0%

مدام التازي ينبوعة محترفةمدام التازي ينبوعة محترفةمدام التازي ينبوعة محترفة
افتراضي رد: تجميع تصاميم البيجامة مع zahrat albarari

تبارك الله على يازهرة البراري
كلشي عندك ممتاز دوق وشرح وتفصيل ماشاء الله عليك
ربي يجعل كل ماتقدمينه في الميزان المقبول
مدام التازي غير متواجد حالياً   رد مع اقتباس

قديم 2012-06-20, 03:54 PM   رقم المشاركة : [7]
loubnach
ينبوعة جديدة
 
التفاعل 0%:
النشاط: 0% النشاط: 0% النشاط: 0%

loubnach ينبوعة محترفة
افتراضي رد: تجميع تصاميم البيجامة مع zahrat albarari

تبارك الله عليك
loubnach غير متواجد حالياً   رد مع اقتباس

قديم 2012-06-22, 01:40 PM   رقم المشاركة : [8]
قمورة بس كريزي
ينبوعة متألقة
 
التفاعل 0%:
النشاط: 0% النشاط: 0% النشاط: 0%

قمورة بس كريزي ينبوعة محترفة
افتراضي رد: تجميع تصاميم البيجامة مع zahrat albarari

تبارك الله عليك هادشي زوين راكي محترفة
قمورة بس كريزي غير متواجد حالياً   رد مع اقتباس

قديم 2012-06-26, 08:27 PM   رقم المشاركة : [9]
nagham
ينبوعة متألقة
 
التفاعل 3%:
النشاط: 3% النشاط: 3% النشاط: 3%

nagham ينبوعة محترفة
افتراضي رد: تجميع تصاميم البيجامة مع zahrat albarari

تبارك الله عليك ،والله يعطيك الصحة.
nagham غير متواجد حالياً   رد مع اقتباس

قديم 2012-06-28, 11:14 AM   رقم المشاركة : [10]
كبيرة اخوتي
ينبوعة متألقة
الصورة الرمزية كبيرة اخوتي
 
التفاعل 0%:
النشاط: 0% النشاط: 0% النشاط: 0%

كبيرة اخوتي ينبوعة محترفة
افتراضي رد: تجميع تصاميم البيجامة مع zahrat albarari

تبارك الله علي الحادكة حوجاتك واعرين الله يعطيك الصحة
حتى انا كنفصل حويجاتي لراسي منها كيجيو قدي منها كيجيو رخاص
كبيرة اخوتي غير متواجد حالياً   رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع
تجميع تصاميم القميجة zahrat albarari
تجميع تصاميم لاكسسوارات المطبخ zahrat albarari
تطبيقي لقراشل للغالية zahrat albarari
ال الاخت zahrat albarari

الرقية الشرعيةاعلانك يحقق اهدافكاعلانك يحقق اهدافكمركز الينبوع لرفع الصور والملفاتاعلانك يحقق اهدافك

الساعة الآن 01:56 PM



Powered by vBulletin® Copyright ©2000 - 2014
Adsense Management by Losha

هذا الموقع يتسخدم منتجات Weblanca.com
new notificatio by 9adq_ala7sas
Ads Organizer 3.0.3 by Analytics - Distance Education

جميع المواضيع المطروحة في المنتدى تعبر عن وجهة نظر أصحابها، ولا تعبر بالضرورة عن رأي | إدارة المنتدى | .

 

RSS - XML - HTML  - sitemap - sitemap2 - sitemap3

 

انضمي لصفحتنا على الفايسبوك
Cultural Forum